ازاى تعملى ميك اب يدووم

هعلمك تعملى ميكسنج ميديم فى البيت ولو مش عارفة ايه هو تعالى اقولك..الحلقة الرابعة :) السلام عليكم ورحمة الله
ازيكم جميعا يا اخواتى العزيزات
النهاردة هقولكم طريقة عمل الميكسنج ميديم فى البيت بابسط و باكبر فوائد للبشرة ممكن تتخيليها
اولا ايه هو الميكسنج ميديم؟
انا دايما بحب اتصفح مواقع المكياج بتاعة لوريال وماك
ادخل اتفرج واكشف راسى وادعى عليهم واخرج تانى
بالظبط زى التعلب لما ما طالش العنب قال ده حصرم
لانى انا عايشة فى حته لما الكونسيلر نزل البلد المحافظ قص شريط الافتتاح بتاعه

لحد ما فى يوم شوفت المنتج ده وماعرفتش ايه هو ده ودورت عليه فى المواقع العربية مالقتش ذكر ليه
لكن منتشر بشكل مكثف على المواقع الاجنبى وعرفت ايه هو اولا ده شكله

هو عبارة عن معادن وقاعدة مائية وجلسرين وشوية مواد حافظة علشان يعيش على الرف مدة كبيرة
والطريقة الاصلية لعمله هى ماية نضيفة من الحنفية (ده عشم ابليس فى الجنة) وجلسرين
طبعا الفهامة لازم تشتغل شوية الجلسرين موجود والمايه فاضل المعادن
طيب ماهو المايه المعدنية فيها معادن وهقولك كمان على الافتكاسات اللى اضفتها علشان بحب اضيف على الحاجة وماخدهاش زى ماهى
االادوات والطريقة بقى
قزازة مايه معدنية صغيرة جلسرين ومايه ورد لو حبيتى مش عايزة اوكى بس انا هقولك بعدين ليه مستحب وقزازة برفان فاضية ببخاخ لو مش عندك يبقى قزازة عادية مش مشكلة

هتاخدى معلقة من الجلسرين وتضيفيها فى القزازة مش هتقدرى بالمعلقة يبقى بغطى القزازة عادى
قدام بقى معلقتين ماية معدنية ومعلقة ماية ورد المهم انه المقدار اللى هتعايرى بيه الجلسرين هو اللى تعايرى بيه الماية

وتقفلى القزازة وترجيها وهتبقى كده كمية قليلة علشان دى مواد طبيعية مافيهاش مواد حافظة فلازم تعملى كمية تكفى اسبوعين مثلا وتحطيها فى التلاجة

نيجى بقى لاستخداماته
الميكسنج ميديم ده زى ما قالت كريستينا اجيليرا jenny in a bottle (عفريت فى قزازة)

اولا: ساعات بيبقى عندنا ايشادوهات وحشة ومش بتعمل اثر او لون وبنقول عليها دى زى التراب مالهاش لازمة اهو الميكسنج ميديم ده مظهر للون وبيخليه يتفرد بسهولة ويثبت جدااا زى كده

ثانيا: ممكن ترشيه على وشك قبل الميك آب وتشربيه فى بشرتك بالتدليك بيخلى كريم الاساس مش تقيل وفى نفس الوقت تغطيته ماتتأثرش وكمان لو حطيتى مايه الورد زى ما قولتلك يبقى كده حطيتى تونر طبيعى بيقبض المسام وبالتالى المكياج يثبت فترة طويلة ودى فايدة ماية الورد اللى قولتلك عليها
ثالثا: احنا فى الشتا ممكن ترشيه على ايدك ورجلك بينعم جدا ويرطب وبيدى لمعة للجسم
الافتكاسة بقى
لو عندك شادو لوس زى ده

مش غالى خالص على فكرة ممكن تاخدى منه شوية وتضيفيه على القزازة لو رشتيه على وشك قبل الميك اب يبقى تحفة لميك اب السواريه
ممكن ترشيه على جسمك هيبقى بيلمع بشكل جميل او لو عندك مناسبة تحطيه للاطفال الصغيرين على جسمهم
او ترشيه على طرحتك مثلا او لبسك هيبقى بيلمع كده وتبقى طرحة سواريه

او ترشيه على شعرك هيبقى تحححححفة
انا كان عندى مناشبة فى العيد حطيته على شعر بنات اخويا بعد ما كويتهولهم

البنات اصحابهم بقيوا يقولولهم الله شعركم شكلوا حلو قوى
على فكرة انا كنت عاملة موضوع عن الايلاينر لو تفتكروا وقولت قطرة فايزن السر ان فايزن فيها جلسرين فعلشان كده ممكن تستعملى الميكسنج ميديم لعمل ايلاينر من الشادو
وكمان انا مشتركة فى مسابقة ميك اب مع رورى مش بستغنى عنه علشان الميك اب بتاعى يطلع حلو
كده انا خلصت يارب اكون افدتكم زى ما انا بستفيد منكم يا اخواتى العزيزات

رجاء اخير يا جماعة ساعة لما عملت موضوع المانيكير اللى تقولى رايقة واللى تقولى مالوش لازمة
يا جماعة مش ذنبى ان ربنا خلقنى رايقة امى زلطتنى كده ههههههههههههههه
وللاسف اصحابى كده معايا فى مستنقع الروقان ومش لاقيين ايد تاخدنا لبر الكأبة
ومش ذنبى انك مش بتحبى الميك اب فبتقولى مالوش لازمة عند غيرك له لزمة
انا بكتب فى قسم الميك اب مش فى المحتارة ولا القضايا الساخنة
يعنى اكيد فايقة ورايقة ده شئ بديهى يعنى
اه معلش انى بكتب كلمة قزازة بالشكل ده لهجتى كده
المرة اللى فاتت العسولة دودى ايمورتال كشفتنى انا افتكرتها هتعدى بس ماشاء الله عليها لاحظت انى مش كتباها ازازة
يلا بقى اتكلمت كتير معلش استحملونى مش بلاقى حد اكلمه فمابصدق

اه صحيح افتكرت لما تستعمليه علشان الايشادو تبلى الفرشه بيه يعنى ترشيه عليها وتاخدى من الايشادو عادى خالص

سلام يا اجمل صحبة
منقووووووووووووووول

المصدر:منتديـات هـواك - hawak

[b]katkota[/b]

يسلمواااااااا

تقبلوا مرورى

المصدر:منتديـات هـواك - hawak

الحب دوما وليس يوما